السلام عليكم ورحمة الله وبركاته
ازيكم يا دكاترتنا
انا مهندس اليكترونيات جاي اسالكم في موضوع كده
انا كنت الاول بلعب كمال اجسام وانا لسه في الكليه دلوقتي فكرت ارجع للجيم تاني بس عندي سؤال مهم واستفسار محتاج شرح
اولا انتوا عارفين صالة الجيم دي اللي بيلعبوا فيها عاملين زي تجار المخدرات .. المهم انا كانت اختي صيدليه بس للاسف هيا مسافرة دلوقتي
عامة
كان الناس اللي فيها كل واحد مربي حاجات غريبه كده في جسمه وبطريقة مش طبيعية
انا مش كنت بقتنع بالكلام ده خصوصا بعد ما تطورت في الجيم وبقيت بستحمل اشيل اوزان . جبت واحد فيهم كان شبه الحلوف كده كنت شاكك انه بياخد حاجة .. لانه كان منظرة فظيع وكان اصغر مني لدرجة انه كان عنده 15 سنه واللي يشوفة يقول عنده 22 او 23 سنه
المهم جبته يتمرن معايا مكملش معايا تمرين كتف
اتصاحبت عليه ودخلت بيته لقيت الترابيزة بتاعته مليانه ادوية وحقن وخصوصا حقنه من نوع اسمه سوستانون .. رحت ماسك العلبه بتاعت الحقنه دي وواخدها في جيبي
وسالت جوز اختي هوا طبيب
قالي ده هرمون الذكورة وده اخطر حاجة الراجل ياخدها وهوا طبيعي لانه بيوقف هرمون الجسم
هوا هيطلعله عضلات ماشي وهيطلعله دقن لو مش عنده بس مع الوقت هيجيله هشاشة عظام وهيعجز بسرعة وغير كده مع الوقت هيفقد رجولته
طبعا انا سمعت الكلمتين دول قلت لا يا عم بلا عضلات بلا بتاع انا هعمل ايه بالعضلات لما ربنا يكرمني يعني واتجوز
المهم قعدت ادور فلقيت حاجة اسمها الاماينو اسيد
بصراحة البتاع ده انا جربته بس مش كنت باخد منه جرعات بغباء كنت بالعقل يعني لو مكتوب علي العلبه معلقتين قبل التمريب وبعده كنت باخد معلقة واحدة
اللي لقيته اتغير بس اني بقيت بستحمل اكتر في التمرين يعني بدل ما كنت بتدرب ساعتين وافيص بقا عندي قدرة اكبر شوية
دلوقتي انا رجعت للتمرين ولاني رفيع ومحتاج استعيد لياقتي البدنية محتاج حد يفتيلي
هل الاحماض الامينية لها تاثير سلبي وخصوصا علي الرجوله ؟
وما هي السايد افيكتس بتاعتها ؟ ولو استخدمتها ايه الجرعة اللي المفروض اخدها ؟
طبعا انا جيت لاصحاب التخصص لاني مش بثق في اي حد من اللي بيتمرنوا كله هيقولي منا باخد اهو يا عم وشغال زي الفل
انا جيت ومحتاج مساعدة قبل ما اخد اي حاجة
معلومات عامة
امنظر الجسم نحيف عامة
الطول 191 سم
الوزن 74 كيلو
23.10.09 23:17